relecturas
El ladino*
una lengua ke no deve morir
Moshe Shaul
Es grasias a la lengua ke la
memoria kolektiva de un puevlo puede ser transmetida de una jenerasion a la
otra. El ladino es la lengua ke permetio a los sefaradís de transmeter sus
erensia kulturala de una jenerasion a la otra, durante mas de 500 anyos, kon
una impresionante fidelidad a sus rayizez ispanikas, lo ke mos pemete agora, a
los sefaradis ke ainda avlamos esta lengua, de tener un dialogo interesante i una
fruchiguoza kolaborasion kon el mundo de avla espanyola.
Esta lengua i su kultura
pudieron mantenersen durante 5 siglos i mas, entre otras razones porke durante
este periodo el ladino fue la “lengua franka” de los sefaradis esparzidos en
las diversas partes del Imperio Otomano i otrunos kuantos paizes mas. Eyos
podian komunikarsen fasilmente en esta lengua i kompartir una mizma kultura, no
solo kon los ke bivian en la mizma sivdad o en el mizmo paiz,. sino ke tambien
kon los ke bivian en otros paizes de este imperio – o en paizes vizinos – desde
Yugoslavia en el oeste i en el este - asta Turkia i la Tierra Santa, la
Palestina de antes dela I Gerra miundiala.
Este estado de kozas se
kontinuo asta la fin del siglo 19 i prinsipios del el siglo 20, kuando komo
konsekuensa de algunos prosesos sosiales, politikos i kulturales, el ladinoempeso
a ser remplasado por el fransez i las lenguas nasionales de los paizes ke ya no
formavan parte del Imperio otomano. La mayoria de los sefaradís empesaron a
avlar i eskrivir en estas lenguas i el ladinofue relegado al rango de “lengua
de kaza”, para avlar kon las tias i avuelas, siendo uzado kada vez menos por
los djovenes ke ya dominavan otras lenguas.
Uno de los rezultados de
este proseso fue el eskayimiento de la kultura djudeoespanyola, el sekamiento
kaje kompleto de los manaderos de su kreasion literaria, i podriamos mizmo
dizir, la piedrita graduala de la memoria kolektiva de los sefaradis, de sus
kantes, kuentos, refranes, uzos i kostumbres etc. Se espandio tambien el uzo de
konsiderar al ladinokomo “lengua muerta” o en el mijor de los kavzos komo “una
lengua destinada a morir”, posibilidad a la kuala se opozaron algunos de los
mas importantes investigadores de la lengua i de la literatura espanyola - komo
Federico Perez Castro, por enshemplo, ke en uno de sus artikolos ekspreso el
dezeo ke “el judeo-español pueda continuar a
ser una lengua viva, palpitante, y no un objeto de museo”– esperansa a la kuala me djunto yo, i kon mi munchos
miles i milarias de sefaradis en las diversas partes del mundo.
En kuanto a los trezoros de
la erensia kulturala sefaradi, una sierta parte ya fue pedrida
irremediablamemnte – ma ainda keda muncho, de grande valor para la cultura djudia
i ispanika tambien, ke podemos rekuperar si azemos el esforso nesesario afin de
salvar del olvido al ladino–avlado oy dia por pokos solo de muestros djovenes.
Para esto kale krear toda la
infrastruktura de la kuala ay menester afin de poder embezar una lengua: formar
maestros i avrir klasas en las eskolas i universidades ansi ke kursos para
adultos; eskrivir i publikar manuales de estudio, livros de gramatika, diksionarios
i mas, enfinenkorajar la kreasion literaria i jurnalistika, ayudando a publikar
periodikos i livros en ladino.
Este esforso, ke empeso
anyos atras i se enfuertesio en Israel ainda maskon la kreasion de la Autoridad
Nasionala del Ladino, ya mos permete agora de afirmar, kon mas optimizmo ke
antes ke “El ladino es una lengua no deve i no va
morir!”
-----------------------------------------------------------
*Ladino –
termino uzado por los sefaradis (al lado de otros terminos komo djudezmo,
djudeo-espanyol, spanyol i mas) para la lengua ke avlaron despues de la
ekspulsion de 1492.